Peysan mín Blíð

Ég er með margt á prjónunum þessa dagana, aðallega að skrifa uppskriftir og þýða á dönsku fyrir íslenska prjónadaga í Kaupmannahöfn næstkomandi september. Ótrúlega spennandi!

Þessi peysa er ein af mörgum sem eru nú á tölvuskjánum og uppskriftin verður tilbúin fljótlega. 

Peysan mín Blíð

 ofur einföld og fljótleg í framkvæmd prjónuð úr einföldum plötulopa. 

Ást & kærleikur

Steinunn Birna

Haustboði - Uppskrift!

Já góðir hlutir gerast hægt.. Nú er loksins tilbúin og vonandi algjörlega villulaus uppskrift af peysunni Haustboði. 

Útfærslan var ekki auðveld, þar sem fyrstu umferðirnar eftir sameiningu erma og bols eru prjónaðar með gataprjóni á bol en slétt á ermum. En eftir miklar vangaveltur, fram og til baka hef ég ákveðið að gefa út uppskriftina, í því formi sem hún er. Ég vil því láta vita af því að það er kannski flókið að lesa úr þessu, en enginn vandi að prjóna ;) 

Peysan fæst í fjórum stærðum 68-74 / 80-86 / 92-98 / 100-104

Hægt er að kaupa uppskriftina fyrir litlar 1000 kr á Ravelry (7.50 USD) eða með því að hafa sambandi við mig á netfangið steinunnbirna@gmail.com 

Kærar þakkir til allra þeirra sem hjálpuðu mér við koma þessu í verk, og sérstakar þakkir til prufuprjónaranna minna þeim Brynju Ingadóttur, Jórunni Oddsdóttur og henni Gústu :) 

Takk! 

Ást og friður

Steinunn Birna

Ryðrauð - endurnýtt munstur úr Sjónabókinni

Gleður mig að vekja athygli á viðtali við mig hjá Kristínu í Fjárhúsinu. 

Ég vildi endilega láta fylgja með uppskrift af peysu sem ég hef nýlega lokið við. Hana gerði ég úr einföldum plötulopa á prjóna nr 4. 

Notaði þennan yndislega lit sem heitir ryðrauð samkemba (1426)

Munstrið er endurnýtt úr okkar yndislegu Sjónabók, en þar eru ótal mörg munstur sem voru nýtt til ýmissa hannyrða áður fyrr. Um ræðir íslensk munstur frá 17., 18., og 19. öld sem varðveitt eru á Þjóðminjasafni Íslands og Þjóðminjasafni Dana saman komin í  um 700 blaðsíðna bók. 

Allt efni bókarinnar er til frjálsrar noktunar í hönnun, handverki og kennslu. 

Yndislega Kristín mín Thorlacius sat fyrir á myndunum sem teknar voru við Eyrarbakkafjöru.

Uppskriftin birtist á netsíðu Fjárhússins  

Njótið vel! 

Akvamarín

Einkadóttirin eignaðist nýjan kjól nú á dögunum..

Kjóllinn fékk heitið Akvamarín (e. Aquamarine), líkt og fallegi steinninn. 

Ég notaði yndislega mjúkt garn, Royal Alpakka frá Dale Garn, liturinn heitir Mint nr 5771. Í kjólinn þurfti ég 3 dokkur. 

Fékk töluna í Freistingasjoppunni á Selfossi. Hægt að panta hjá þeim í gegnum Facebook síðuna þeirra. 

Dóttir mín er í st 98 og hann passar bara nokkuð vel á hana. Ég notaði tvenns konar gatamunstur frá Prjónakistunni fékk leyfi til birtingar á þeim. 

Setti inn uppskrift í stærð 98 inn á Ravelry síðuna mína og þar er hægt að sækja hana frítt :)

Verði ykkur að góðu! 

Steinunn Birna

Þýðing á uppskrift

Birti umfjöllun og myndir af yndislegu peysunni minni hér fyrr í vikunni. 

Hef verið í peysunni minni nánast allan desember og hafði lofað samstarfskonu minni að þýða uppskriftina yfir á íslensku svo hún gæti gert sér svona kósípeysu líka ;) 

Nú hef ég staðið við stóru orðin! Hér kemur þýðingin. Upprunalega uppskriftin er frá breska blogginu Without Seams

Ég notaði einfaldan plötulopa og mohair, nál nr 6,5 og gerði minnstu stærðina. 

Skammstafanir:

LL = loftlykkja

HST = hálfstuðull

ST = stuðull

L = lykkja (stitch)

LLgat = Loftlykkjugat

Peysan er hekluð ofan frá og niður. Fyrst er heklað axlastykki, svo eru lykkjur fyrir ermar teknar frá og haldið áfram að hekla niður bol. Ermar eru heklaðar fram og til baka og saumaðar saman að endingu.

Gerið 47 (50, 62, 68) loftlykkjur

Axlarstykki:

Umferð 1:  Gerið HST í 3ju L frá heklunál, hoppa yfir 1 L, *HST í næstu L, 2 LL, HST í næstu L, hoppa yfir 1 L, endurtakið frá * að síðustu L, 2 HST í síðustu L. =>  60 (64, 80, 88) L.

Umferð 2: 3 LL, 2 ST í fyrstu L, hoppa yfir 1 L, *(2 ST, 2 LL, 2 ST) í hvert LLgat, hoppa yfir 2 L. Endurtakið að síðasta LLgati, (2 ST, 2 LL, 2 ST) í síðasta LLgat, hoppa yfir 1 L, 1 ST í síðustu L , 2 ST í síðasta LLgat (e. top of turning chain). => 90 (96, 120, 132) L.

Umferð 3: 3 LL, 2 ST í fyrstu L, 1 ST í næstu L, hopps yfir 2 L, *1 ST í næstu L, (2 ST, 2 LL, 2 ST) í næsta LLgat, 1 ST í næstu L, hoppa yfir 2 L, endurtakið frá * að síðustu L, 2 ST í næstu L, 2 ST í síðasta LLgat. => 120 (128, 160, 176) L.

Umferð 4: 3 LL, 2 ST í fyrstu L,  1 ST í næstu L, hoppa yfir 2 L, *1 ST í næstu 2 L, (2 ST, 2 LL, 2 ST) í LLgat, 1 ST í næstu 2 L, hoppa yfir 2 L, endurtakið frá *þar til 2 L eru eftir, 1 ST í næstu L, 2 ST í næstu L, 2 ST í síðasta LLgat. => 150 (160, 200, 220) L.

Umferð 5: 3 LL, 1 ST í fyrstu L, 1 ST í næstu 3 L, hoppa yfir 2 L, * 1 ST í næstu 3 L, (1 ST, 2 LL, 1 ST) í LLgat, 1 ST í næstu 3 L, hoppa yfir 2 L, endurtakið frá * þar til 3 L eru eftir, 1 ST í næstu 3 L, 2 ST í síðasta LLgat. => 150(160, 200, 220) L.

5. umferð er endurtekin þar til axlarstykki hefur náð ákjósanlegri stærð. Hægt er að máta við sig til þess að átta sig á stærðinni.

Að skipta axlarstykki upp í ermar og bol:

Setjið 1. merki eftir 20 (25, 30, 35) L, 2. merki eftir 50 (55, 70, 75) L ,3. merki eftir 100 (105 , 130, 145) L og 4. merki eftir 130 (135, 170, 185).

Þá er búið að skipta axlarstykki upp í fyrra framstykki, fyrri ermi, bak, seinni ermi og seinna framstykki.

Gerið loftlykkur við handveg:

Með nýjum spotta af bandinu sem er notað, gerið keðjulykkju ofan í lykkju við 1. lykkjumerki, 10 LL, sameinið með keðjulykkju við 2. lykkjumerki. Slítið frá og gerið keðjulykkju við 3. lykkjumerki, 10 LL, sameinið með keðjulykkju við 4. lykkjumerki. Slítið frá bandið.

Loftlykkjurnar 10 samanstanda af einni endurtekningu af munstri við handveg.  

Bolur:

Haldið áfram með sama band og áður. Endurtakið umferð 5: Fyrra framstykki,  sleppið fyrri ermi og heklið munstrið í 10 LL við handveg (líkt og hver LL væri L frá umferðinni á undan), heklið bak, sleppið seinni ermi og heklið munstrið í 10 LL við handveg (líkt og hver LL væri L úr umferðinni á undan) og heklið seinna framstykki.

Endurtakið munstur með því að hekla fram og tilbaka þar til ákjósanleg lengd á bol hefur náðst.

ATH! Hér gerði ég breytingu:

Heklaði 3 umferðir af 5. umferð. Næsta umferð varð svona:

Umferð 5: 3 LL, 1 ST í fyrstu L, 1 ST í næstu 3 L, hoppa yfir 2 L, * 1 ST í næstu 3 L, (2 ST, 2 LL, 2 ST) í LLgat, 1 ST í næstu 3 L, hoppa yfir 2 L, endurtakið frá * þar til 3 L eru eftir, 1 ST í næstu 3 L, 2 ST í síðasta LLgat. (Afsakið, taldi ekki hvað ég endaði með margar lykkjur)

Endurtók svo þessa umferð þar eftir:

3 LL, 1 ST í fyrstu L, 1 ST í næstu 3 L, hoppa yfir 2 L, * 1 ST í næstu 4 L, (1 ST, 2 LL, 1 ST) í LLgat, 1 ST í næstu 4 L, hoppa yfir 2 L, endurtakið frá * þar til 3 L eru eftir, 1 ST í næstu 3 L, 2 ST í síðasta LLgat.

Semsagt jók um 2 ST í hverri endurtekningu en lét jaðrana halda sér. Það má auðvitað gera aukninguna þar líka, bara smekksatriði.

Ermar:

Setjið nálina niður í 7. (6., 7., 6.) L í neðri hluta ermanna, 3 LL (gildir sem 1 ST) og heklið munstur úr 5. umferð gegnum ermi. Í lok umferðar, sameinið með keðjulykkju og snúið við. Endurtakið þar til ermar hafa náð ákjósanlegri lengd.

ATH!

Mér fannst þetta frekar torskiljanlegt. En passaði mig á byrja bara við miðju á neðri hluta hringsins og hekla svo í þá átt sem myndi passa við axlarstykki, s.s. hvort umferðin í axlarstykkinu sneri á röngu eða réttu, svo að áferðin yrði áfram eins.

Breyting –> Ég heklaði svona þar til ég var búin með 14 umferðir. Þá fækkaði ég um 1 ST í lok hverrar umferðar þar til ég var búin fækka um 8 L. Heklaði svo þar til ermin var orðin nægilega löng eftir það.

Það kemur hvergi fram í ensku útgáfunni að það eigi að sauma saman ermarnar en ég býst fastlega við því að það þurfi að gera fyrst þær eiga vera heklaðar fram og til baka.

Heklaður kantur: (ég sleppti honum)

Byrjið neðst við fyrra framstykki og gerið 2 fastalykkju í hverja umferð meðfram kantinum, 1 ST í hverja L við hálsmál (3 L í hornin) og 2 fastalykkjur í hverja umferð niður seinna framstykki. Endurtakið að vild og bætið við hnappagötum ef vill (2-3 LL)

Gangið frá endum og þvoið varlega í höndum. 

Njótið vel! 

Steinunn Birna

Hlý og notaleg peysa

Nú í kuldanum veitir ekki af því að eiga eina unaðslega notalega og hlýja peysu. Mig vantaði einmitt eina slíka núna fyrir veturinn og leitaði eftir góðum hugmyndum á Pinterest. Þar fann ég eina sæta uppskrift sem er hægt að sækja ókeypis á Ravelry.  

Ég gjörsamlega elska þessa peysu.. Heklaði hana með nál nr 6,5 og notaði einfaldan plötulopa og mohair saman. Yndislega mjúk og hlý..

Ég gerði smávægilegar breytingar á upprunalegu uppskriftinni: 

Þegar komið er að því að hekla bolinn (peysan er hekluð ofan frá og niður) gerði ég útaukningu eftir 3 umferðir. Í staðinn fyrir 4 st bætti ég við þannig það væru alltaf gerðir 5. 

Breytti líka ermunum, þær áttu að vera heklaðar beinar alla leið niður en ég ákvað að það væri flottara að hafa smá þrengingu neðst. Eftir 14 umferðir eins og uppskriftin segir fækkaði ég um 1 stuðull í hverri umferð næstu 8 umferðir. 

Þessi peysa er mjög fljótgerð og skemmtileg í framkvæmd,  hér er smá umfjöllun um hana á Ravelry síðunni minni :) 

Eigið yndislega daga yfir hátíðarnar! 

Steinunn Birna

Sjálfboðaliðar óskast!

Komið sæl 

Nú í haust prjónaði ég þessa yndislegu peysu á yndislegu dóttur mína. 

Ég er gjörsamlega ástfangin af litnum sem ég notaði en það er léttlopi nr. 0086 frá Ístex og heitir því skemmtilega nafni ljósljósmórauður. 

Uppskriftin mun koma í sölu von bráðar og leita ég því eftir áhugasömum og fljótprjónandi sjálfboðaliðum til villuprófa uppskriftina fyrir mig. Þeir myndu fá uppskriftina að sjálfsögðu fría að launum :)

Einnig leita ég að tillögum að nafni fyrir peysuna :) 

Áhugasamir sendið mér póst á steinunnbirna@gmail.com. 

Hér eru myndir af gullinu mínu í peysunni sem teknar voru í Reykjaréttum síðastliðinn september: 

Ástar þakkir!

Steinunn Birna

Frozen peysan

Góðan daginn kæru prjónarar

Fyrir rúmu ári síðan (september 2013) þá lauk ég við að prjóna eina afar skemmtilega peysu. Tilefnið var hönnunarsamkeppni á vegum  „Gengið til fjár“ í samvinnu við Ístex og Landssamtök Sauðfjárbænda. Þemað var sauðkindinn og íslenskt óveður, til minningar um mikið óveður sem geysaði haustið 2012, þar sem kindur voru grafnar upp úr fönninni eftir langan bið.

Peysan fékk nafnið Bylur, en mér fannst það passa einkar vel við – enda samanstendur mynstrið af mörgum snjókornum, eða frostrósum.

Í ágúst síðastliðnum (2014) kom út prjónablaðið ÓVEÐUR frá Ístex með yfir 30 uppskriftum af peysum sem höfðu verið sendar inn í keppnina. Þar á meðal mín peysa, Bylur.

Stuttu eftir að blaðið kom út frétti ég af því inni á facebook-hópnum „Handóðir prjónarar“að peysan mín væri kölluð „Frozen peysan“.  Mér fannst það mjög skemmtilegt, enda passar hún afar vel inn í þemað í Frozen, eða Frosinn eins og Disneymyndin heitir á íslensku.

Mikil eftirspurn var eftir uppskrift af peysunni svo ég hóf að selja uppskriftina staka á pdf-formi. En þá var peysan aðeins til í stærðum fyrir 2-6 ára. Vegna mikillar eftirspurnar ákvað ég því að bæta við stækkun á uppskriftinni,  svo nú er hún einnig til í stærðum fyrir 7-10 ára.

Peysan er til sölu á Ravelry síðunni minni og kostar þar 4.50 USD. Ég hef einnig boðið uppá að kaupa peysuna beint af mér, fyrir þá sem hafa ekki kreditkort eða eru ekki innskráðir á síðuna. Þá er best að hafa samband á steinunnbirna@gmail.com.

Gróft hálsmen

Ég fann í Litir og Föndur á Skólavörðustíg fyrir jólin í fyrra rosalega skemmtilegt gróft teygju garn sem ég bara varð að eignast. Heklaði úr því eina jólagjöf í fyrra en á því miður ekki mynd af henni en það var svona stór dúlla í anda þessara hér: 

En nú hef ég loks gert eitthvað meira úr garninu, úr varð hálsmen:

Uppskriftin er afar einföld: 

Ég notaði prjóna nr 15, heklunál nr 7 (minnir mig, má alveg vera stærri) og gróft teygjugarn. 

Fitja upp á 13-14 lykkjur og fyrsta umferðin er þannig að allar lykkjurnar eru felldar af. Svo heklaði ég nógu margar loftlykkjur og tengdi saman. Gangið frá endum með því að vefja þeim inn þar sem þeir sjást ekki og jafnvel sauma með svörtum tvinna til að tryggja að hann fari ekkert á flakk :)

Megið eiga góða helgi í kuldanum!

- Steinunn Birna -

Henning Darri gullmoli

Óvenju dugleg að blogga núna.. er sko að skrifa ritgerð og læra undir próf!

En hér er einn ungur herramaður sem ég elska endalaust mikið! Henning Darri systursonur minn og guðsonur. 

Hann fékk þessa dýrindis peysu frá frænku sinni núna um daginn. Uppskriftina af henni má finna í Stóru Prjónabókinni. Ég prjónaði hana úr kambgarni, en notaði svo ýmsa afganga í berustykkið. Þetta er ofur einföld peysa sem ALLIR geta prjónað! 

Ég fór reyndar ekki alveg 100% eftir uppskriftinni. Það er svo kölluð laska úrtaka á berustykkinu, þar átti að gera lykkjurnar á milli alltaf sléttar en ég gerði þær með garðaprjóni eins og öll peysan er prjónuð. 

Fékk þessar fínu trétölur í Freistingasjoppunni. 

En ég kann líka að hekla. Heklaði þessa krúttlegu Converse fyrir Henning Darra líka. Hér er uppskrift af skónum.

Ætli ég verði ekki að fara læra núna...

- Steinunn Birna -

Jólaprjón

Eru ekki allir að fara prjóna jólapeysu fyrir þessi jólin? 

Mig langar en veit ekki með tímann.. Hér er smá Pinspiration frá elsku pinterest.

Elskum hreindýr!

Sumt er ætlað fyrir krosssaum, en það má sko alveg nota það sem prjónamynstur líka :)

- Steinunn Birna - 

Afmælisgjöfin frá langömmu

Betra er seint en aldrei! 

Hún Þórunn Erla mín varð 1 árs fyrir rúmum mánuði síðan. Hún er svo lánsöm að eiga mikla prjóna-langömmu sem býr á Eyrarbakka. Hún færir öllum ömmu- og langömmubörnunum sínum prjónaðar gjafir sem eru svo yndilega fallegar. Þórunn Erla á nú orðið allnokkrar flíkurnar eftir hana, vettlinga, húfur og peysur. Þær hafa sko komið sér vel, sérstaklega hjá dagmömmunni eða þegar við förum út að leika :)

Núna í eins árs afmælisgjöf fékk Þórunn mín þetta yndislega sett af peysu lambhúshettu og vettlingum. 

Mig minnir að mynstið í peysunni sé fengið uppúr einhverju lopablaðinu frá Ístex, en þetta er prjónað úr Smartgarni. Vettlingarnir eru sérstaklega góðir, þar sem stroffið er ekki of þröngt en nær vel upp svo þeir eru bæði mjög hlýir og eru ekki að detta af í tíma og ótíma. 

Aldeilis lukkuleg í afmælisgjöfinni frá langömmu á Eyrarbakka. 

Já, svo varð ég að fara út fyrst við vorum nú að klæða okkur í útifötin. Annað er kom ekki til greina! 

- Steinunn Birna - 

Frú Föndra

Ég reyni alltaf vera rosalega skipulögð. Legg áherslu á reyni. Það tekst ekki mjög oft hjá mér en þetta kemur vonandi með aldrinum ;) Eitt tilraunaverkefnið í skipulagningu hjá mér er Frú Föndra. Það er sæt bleik mappa sem ég reyni að setja inn allar þær uppskriftir eða mynstur sem ég prenta út eða teikna upp. Hef náð að safna í smá bunka :)

Svo náði ég mér í bókina Prjónað úr íslenskri ull á bókasafni síðasta vetur og teiknaði upp uppáhalds mynstrin mín til að eiga 

Afgangapeysan mín góða

Komið sæl kæru prjónvinir! 

Einn daginn síðastliðið vor fékk ég algjörlega nóg af öllum spottunum og endunum sem ég átti svo allt of mikið af. Ég (og reyndar mamma líka) átti fullan höldupoka af léttlopa afgöngum. Mig langaði að sjálfsögðu að gera eitthvað skemmtilegt úr þeim og datt í hug að hekla mér peysu. 

Úr varð að ég byrjaði á því að hekla heilmargar loftlykkjur (taldi ekki hvað margar), heklaði svo stuðla fram og til baka þar til spottinn kláraðist. Þá tók næsti litur við og svo koll af kolli. Sumar dokkurnar voru þó full stórar svo ég klippti á spottann stundum án þess að klára litinn, en tók þá þráðinn upp seinna meir. 

Þegar báðar ermar og búkur voru til sameinaði ég allt saman, heklaði fram og til baka berustykkið og tók úr í hverri umferð með því að hoppa yfir eina lykkju. 

Þegar leið á peysunna fór ég að verða upppiskroppa með liti, svo ég tók smá af hvíta litnum og litaði hann. Fékk neongrænan, ljósbláan og skærgulan þar. 

Þar sem búkurinn var heklaður fram og til baka, fannst mér réttast að gera það líka með ermarnar, annars kæmi önnur áferð á þær ef ég hefði heklað þær í hring. 

Lauk svo peysunni með bleikalitnum sem setti punktinn yfir I-ið :)

Einfaldara gæti þetta ekki verið!

Kveðja

- Steinunn Birna -